Luk 11 | WSK | STEP | Tom bo Jesus kuwim bo te Kaem ilak munakawaram. Ale udagi te munaka kutuwuram asele ko olekem bo nu isuam, “Kari Biya, John ko olekem alo nunga kausam iwitata, ni ana aguwaya Kaem ilak munakanakko wore ko lage nanga kasuruko.”

Luke 11

Kaem aru ngatonga ko munan

(Mat 6:9-15; 7:7-11)

1 Tom bo Jesus kuwim bo te Kaem ilak munakawaram. Ale udagi te munaka kutuwuram asele ko olekem bo nu isuam, “Kari Biya, John ko olekem alo nunga kausam iwitata, ni ana aguwaya Kaem ilak munakanakko wore ko lage nanga kasuruko.”

2 Se Jesus nunga maonam, “Tom nina Kaem aru maonalko mu iwita balalko:

‘Anananga Ba, nika nip laili kualala biya anirukko.
Nika kingdom am tairukko.
3 Ni tom koma koma ko na inang nangaruko.
4 Anananga memek siwurko.
Saki alo ikup ana nangimik te betesan mu ana karogo siwusan.
Ni nanga bitar se Satan tairuk me nanga ira arigokko.’ ^{▼▼Luke 11:4 Batoga saki girakala batagorman mu te den imi ago aniso: “Kari memek mu kuting te nanga bataguru toko.”}
Iwitata Kaem aru maonalko.”

5 Jesus ko olekem nunga maonam, “Se ni ka geraga suwan bo lage karuk turom uriluan agi nikate tairuk, se ni na nu tuiko bare na mena agi, se ni kapar ale ka launuria bo kote namar ale iwita manaruko, ‘Aga bo, ni bread ilagala suwan aisuko. 6 Aninga geraga suwan bo lage kaoram tai aningate aratam, se ani na tuekko bare na mena se,’ ma balu, 7 se nika launuria kawam ningi mu iwita baluk, ‘Ni ura kowar ani me aisuko! Ani songkuring maingkala bagurem, se kuriang maingkala tala ani agarak aniwasan. Se ani barasik mel bo ni me kisekko,’ ma iwita baluk, ale nu ko launuria ni mu nu ka ikiso, bare nu am aniwuruk, 8 bare mu ani iwita ka manorsam, ni mel ko kuerem mu ko am bo ago aru sager, mu nu barasuk mel to kisokkowo! ^{▼▼Luke 11:8-10 Ana sail karogo ngatanganakko: Luke 18:5.}

9 “Se ani ninga manorsam, nina mel ko isal, mu nina mel mu talko. Nina mel ko loagaral, mu nina mel mu arigalko. Nina songkuring bong bong mal, mu songkuring kaiga ningarukko. 10 Mu awuk, kari awiriya mel ko iseso mu taso. Se awiriya mel ko loagoso mu arigiso. Se awiriya songkuring bong bong maso mu songkuring kaiga tuso. 11 Se nenenga ningi ninga kuriang bo wal ko nuet isok, mu ko nuet urer tauk ale nu tuok i? 12 Agi tarak ningo ko isok, mu nu kua iluwok ale tuok i? Mena. 13 Nina kariimet memek ta, bare nina mel ningo la ninga kuriang nungara ikisan. Butatala ninga Ba duruk te bagoso mu awiriya Korang Bur ko nu aru ngatanguk, mu nu Korang Bur ninguru tala tuokkowo.” ^{▼▼Luke 11:11-13 Anananga Nainet yawara mu mel ningo nangarukko: John 14:13-16.}

Nuna balukasan Jesus Beelzebul ko sokel te ura beteso makasan

(Mat 12:22-30; Mark 3:20-27)

14 Jesus bur memek kari bo kumik ningi baga se korang kalowara wore kaoram se kari mu aking munakakaso. Se kariimet mel mu aringiman ale nungamin yenakaso. 15 Bare kari sang balukasan, “Mu Beelzebul, bur memek nunga supuling, wore sokel nu tuso se te bur memek nunga karoso.” ^{▼▼Luke 11:15 Beelzebul mu Satan ko nup bo.} 16 Se kari sikina Jesus ira aringimonko iwita manorman, “Ni duruk wonong ko kilek biya bo bitar se ana aringinakko.”

17 Bare Jesus nunga ikia mu arigam ale balam, “Ali sor bo ko kariimet papak mamon motam ilagala nunumi karogo kagermon, mu ali sor umutang sokel ago me bagurukko, mu dagulokko. Aking kari gue suwanta nunumi karogo kagermon, mu nuna betela sokel ago me bagomonko. 18 Butatala, Satan kota ko ura kari nongorak kageruruk nunga karuk, mu noko kingdom sokel ago aniruk i? Mena. Ani buta ninga manem, mu awuk, nina balsan, ani Beelzebul sail aisiso se te bur memek nunga karosam ma balsan. 19 Se nenenga den mu nunguning agi mu, awiri nenenga saki alo sail nungarso se bur memek te nunga karosan? Beelzebul tala e? Bare nina buta balal mu nuna ining ningarmonko! 20 Ani mu Kaem ko sokel te bur memek nunga karosam, se nina te iwita ikialko, Kaem ko kingdom te anirukko nenenga ningi sokel ago la ura iluwoso.

21 “Kari sokel ago ko gatu karem iluwok ale ko kawam bituokko, mu noko melmasak suen la yawarakala anirukko. 22 Bare kari bo sokel ago nunguningkiri mu tairuk, mu nu kari gatu karem ago mu iluwok moruk, ale ko gatu karem, nu ikikaso te yawarakala numi bituokko iwita ikiwakaso, mu kututuwu giok, ale talipa bitiruk se baguruk, asele ko kawam te melmasak giok ago nama ko sikisaki nungaru gurugokko.”

23 “Kari ani agowom me karoso, mu nu aninga kager kari nunga bo. Kari ani agarak sipsip me bolala awuso, mu nu sipsip nunga parasuwuso.

Bur memek peleso ale taiso ko den

(Mat 12:43-45)

24 “Bur memek kari bo kumik ningi baga bitiruk, mu nu sor garagarayam mu te namuruk ale geraguk kuwim ningo te noman sapurukko wore ko loagurukko. Bare nu me arigok, ale nu baluk, ‘Ani pelerik nama aga agiwim mungkala te bagerem mu te aking bagirikko,’ iwita ma balukko. 25 Ale nu aking peleruk tairuk, kuwim te bagaram mu ungi nunguru beteman se aniso mu arigok, 26 mu nu peleruk bur memek 7 tala, nu kilek memek betera te nu kiaman, mu nunga giok, se nuna ilak taimon, ale kuwim suwanta mu ningi ilak bagomonko. Se kari imi ulengkala memek bagakaso, bare aitak mu memek ko memek nunguningkiri bagurukko.”

Amilmil nunguning

27 Jesus den imi baluwaram se imet bo kariimet motam biya mu ningi bagaram mu biyala airam balam, “Imet nika iluwam amin kisuwaram se lagerem, mu nu am amilmilurukko!” mam. 28 Bare Jesus balam, “Mena. Kariimet Kaem ko den ikisan ale karo tusan, mu nuna am amilmilomonko.”

Jesus kumik te mel bo kilimik ta aringimonko isarman

(Mat 12:38-42; Mark 8:12)

29 Kariimet suen biya Jesus taluru guruguman, se nu iwita nunga maonam, “Nina tom imi ko kariimet, nina kariimet memek! Nina ani kilek biya bo bitirik se arigalko isa lagasan! Bare ani bo me bitirik se arigalko. Kilek Jonah kumik te aratam mu te la ikialko. 30 Kilek Jonah kumik te aratam mu Nineveh kariimet te ikimon ale giris palagomonko. Mu turantala, kilek Kari ko Kuriang kumik te aratukko mu nina tom imi ko kariimet te ikial ale giris palagalko.

31 “Tutera kam te, ali sor Sheba ko imet supuling mu barasuk ale den te ninga atumokkowo! Mu awuk, nu ali dun sang awar biya koma south mu te baga, bare nu Solomon ko ikia ningo baluk se ikiokko kote tairam. Bare Kari bo aitak imi te bagoso mu nu Solomon kiaram, bare nina ko den ikialko mesan.

32 “Se aking Nineveh kariimet betelatala tutera kam te barasomon ale den te ninga atumumonkowo! Mu awuk, nuna Jonah ko den apuram mu te giris palagaman. Bare Kari bo aitak imi te bagoso mu nu Jonah kiaram, bare nina mu me giris palagasan. ^{▼▼Luke 11:31-32 Ali sor Sheba ko imet supuling: 1 Kings 10:1-10. Jonah: 3:5-10.}

Anananga namatam mu nangamang motam ko galep

(Mat 5:15; 6:22-23)

33 “Kari bo galep kasoso ale kani ningi me beteso, kawam atepe mutim ningi me beteso tala. Mena. Nu kualala wetang te beteso se kariimet kasu nagusan mu nikim nungarso.

34 “Nemetam mu nengemang motam ko galep iwita. Nemetam yawarakala, mu nengemang nikim ago. Nemetam memek, mu nengemang tiromorom pagoso. 35 Buta se nina ninga galep ko ninguru sinar talko, nengemang tuagu tiromorom paguk bore ko. 36 Nengemang tuagu tiromorom bo me irok, mu nina galep nikim ningarso se te bagasan iwitatala nikim te yawarakala bagaralko.” ^{▼▼Luke 11:34-36 Nikim te yawarakala baganakko: John 1:9; 3:19-21; 8:12; 2 Cor 4:6; 1 John 1:5-7.}

Pharisee se Law Den ko kausa kari nunga munan kawel

(Mat 23:1-36; Mark 12:38-40; Luke 20:45-47)

37 Jesus den balu kutuwuram mu Pharisee kari bo nu auram, nu noko kawam te namuruk ilak na yu naukko balam. Se nu namaram daigam ale na yu nowaram. 38 Se Pharisee mu Jesus giram kuting me anuwam wore na nowaram se arigam ale ko ikia moakaso.

39 Bare Jesus nu maonam, “Nina Pharisee alo mu nina kani taiwir kumik guang la anusan ale naung karur ago mu me anusan wore turan. Se nenenga nengemang ningi mu tere daong ko kilek, se munan memek ninguru kuring aratam. 40 Nina kari ngualara! Kaem mel kumik guang awete nungam mu naung ningi agotala nungam! 41 Buta se nina ningimik guang la me nungalko, nengemang ningi agotala nungalko. Nina meltutuk nenengate aniso ^{▼▼Luke 11:41 Bala bo mu iwita: “Na mel taiwir ningi aniso mu kariimet nungumik mel mena mu nungaral, mu asele nenenga nengemang ningi mu nikim pagukko.”} mu sang kariimet nungumik mel mena mu nungaral, mu asele nenenga nengemang ningi mu nikim pagukko.

42 “Nina Pharisee alo, sinar talko! Mu awuk, nina tuwer marasang se meltutuk gotektek gisan motam 10 bolala awusan ale suwanta Kaem tusan. Se mu terong. Bare nina munan den bibiya ningamili saparam, se munan diram te saki arungu me bagasan, ale Kaem ko me kuesan. Munan bibiya umutang mu karo tualko nunguningkiri.

43 “Nina Pharisee alo, sinar talko! Mu awuk, nina synagogue ningi kuwim nup ago wore te daigalko ninguru ko kuesan. Nenenga nengemang motam mu biguwura kuwim te namaral se kariimet amilmil ningarmon ale ninip patawomonko kuesan.

44 “Nina sinar talko! Kariimet ningarkasan kari ningo ko ninga balsan. Bare ninga nengemang ningi mu kari kuera se mutim tugu betera se iwiwara, se ko ali motam ko deger mu parasoso menaso se kariimet me ko ikisan, am ali ningo ko balsan ale awete aolak ilusan namasan taisan iwitata.”

45 Jesus uwuta balam se Law Den ko kausa kari bo nu maonam, “Kari biya, ni suwuta balsam mu ni ana Law Den ko kausa kari alo mu ago nainip maguwusam!”

46 Se Jesus balam, “Nina Law Den ko kausa kari alo mu nina betelatala ninguru sinar talko! Mu awuk, nina mel ikup gotek am mena kariimet gimonko nungarsan se nuna ura kowar betesan. Bare ninga nigiting bo me nunga sangarso.

47 “Nina sinar talko! Nenenga taleng girigir alo prophet nunga moman se kueman, se nina aking prophet alo umutang nunga ali motam nungursan burangasan. 48 Bare munan nina betesan sumu te balsan, ninga taleng girigir nunga munan beteman wore yawara ko balsan. Nuna mu prophet alo nunga moman se kueman, se nina mu nunga ali motam nungursan!

49 “Se umutang ko, Kaem ko Ikia Ningo Ago mu maingkala ikiam ale iwita balam, ‘Ani prophet saki apostle ago nunga bitirik se Israel alo nongote namomon, se saki nunga momon se kuemon, saki nunga maguwumon silatomonko,’ ma balam. 50 Buta se, girakala Cain ko uria Abel moram se kueram, eng karo karo prophet nunga moman se namaram, eng tai Zechariah nu temple ningi altar se kuwim kako mu kusumuri bagaram se moman se kueram, bare kari suen la imi nunga gue mu nina kariimet tom imi ko mu nigiting te aniruk se ko koma memek talko. Ani ninga manorsam, mel mu suen la ko koma nina tom imi ko kariimet mu gialkowo.

52 “Nina Law Den ko kausa kari alo, sinar talko! Mu awuk, ikia ningo te ta ko ZZZ bugu / key mu nina ilusan, bare nina nengeta songkuring kagorsan ale me ningi nagusan. Se betela, kariimet ningi nagumon ale Kaem ko ikimonko, bare nina nunga lage kalosan.”

53 Jesus kawam mu beteram ale namawaram, mu Law Den ko kausa kari alo se Pharisee alo nu ko nongomang ninguru magaram, se nongomang memek te isaru diruwukasan ale isa suen biya tuikasan, mu awuk, nu te den saki supurok se den ningi betemonko.

54